Nagpadayon sa ilang misyon sa serbisyo publiko ang 1st Zamboanga del Norte Provincial Mobile Force Company (ZNPMFC) pinaagi sa pagpahigayon og lecture kabahin sa Anti-Bullying Law ngadto sa mga estudyante sa Potungan National High School sa Barangay Potungan, nga gipangulohan ni PLTCOL Ryan Jay R. Capurcos, Force Commander, pinaagi sa 2nd Forward Operating Base (FOB) Platoon.
Tumong niini ang pag-edukar sa kabatan-onan mahitungod sa ilang responsibilidad sa pagtahod sa isigkatawo ug sa pagbatok sa tanang matang sa bullying sulod ug gawas sa eskwelahan.
Gipasabot sa kapulisan ang mga probisyon sa Republic Act No. 10627 o Anti-Bullying Act of 2013, nga naglatid sa mga lakang aron mapanalipdan ang mga estudyante batok sa pisikal, berbal, ug cyberbullying.
Sumala sa PNP, ang maong inisyatiba kabahin sa ilang padayon nga paningkamot sa pagpalig-on sa kampanya batok sa bullying ug sa pagdasig respeto, ug responsableng pamatasan taliwala sa kabatan-onan.(IKEN B. GULLEM)
Source: Zamboanga del Norte 1st Provincial Mobile Force Company