Kapin sa 200 ka Child Development Workers (CDWs) ug Early Childhood Care and Development (ECCD) workers gikan sa nagkalain-laing lungsod ug duha ka dakbayan sa Zamboanga del Norte mitambong sa Provincial CDW Forum nga gipahigayon sa Ground Floor, Plenary Hall sa Zamboanga del Norte Convention and Exhibition Center.
Ang kalihukan gipangulohan sa Provincial Social Welfare and Development Office, nagtumong sa pagpauswag sa kapasidad sa mga CDW ug ECCD workers isip mga frontliners sa pag-atiman ug paghulma sa kabataan sa ilang unang mga tuig sa pagkat-on.
Sumala kang Acting PSWDO Hannah Lou G. Mandantes, dako ang papel sa mga Child Development Workers sa paghulma sa pundasyon sa kahibalo ug kinaiya sa mga bata. Gipaabot usab ni Governor Darel Dexter T. Uy ang padayon nga suporta sa probinsyal nga pangagamhanan sa mga programa alang sa early childhood development.
Lakip sa gihisgutan ang overview sa Republic Act No. 12199 nga gipresentar ni Provincial ECCD Focal Person Marjorie Sherahmicah M. Pascua, uban ang diskusyon sa developmental milestones ug paggamit sa ECCD Checklist aron mapalig-on ang assessment ug monitoring sa mga bata sa Child Development Centers sa probinsya.
Pinaagi sa maong forum, gilauman nga mas mapataas ang kalidad sa serbisyo sa mga Child Development Centers ug masiguro ang lig-on nga pundasyon sa pagkat-on sa kabataan sa tibuok probinsya.(IKEN B. GULLEM)
Source: Zamboanga del Norte Provincial News