Nanumpa na ang 220 ka bag-ong Patrolman ug Patrolwoman sa Police Regional Office 9 (PRO 9) ubos sa CY 2025 Attrition ug Regular Quota atol sa Oath Taking Ceremony nga gipahigayon sa PRO 9 Grandstand, Camp Col. Romeo A. Abendan.
Ang seremonya gipangulohan ni Police Brigadier General Edwin A. Quilates, Regional Director sa PRO 9, uban sa mga opisyal sa PRO 9, NAPOLCOM, ug ubang partner agencies, atubangan sa mga kapamilya ug hinigugma sa mga bag-ong police recruits.
Sa kinatibuk-an, 200 ka recruits ang sakop sa Attrition Quota ug 20 sa Regular Quota, nga nagtimaan sa ilang opisyal nga pagsulod sa serbisyo isip miyembro sa Philippine National Police. Lakip sa kalihokan ang ceremonial turnover sa ATM card, simbolo sa ilang unang responsibilidad isip mga kawani sa gobyerno.
Gipasiugda ni PBGen Quilates sa iyang mensahe ang disiplina, integridad, ug pagsunod sa balaod isip pundasyon sa police service. Gi-awhag niya ang mga bag-ong pulis nga magpabiling matinud-anon sa ilang panumpa ug mag-alagad sa katawhan uban ang kasingkasing ug dedikasyon.
Natapos ang kalihokan sa pormal nga turnover sa mga bag-ong pulis ngadto sa Training Center 9 alang sa ilang hugot nga pagbansay, samtang gipadayon sa PRO 9 ang tumong sa pagpalig-on sa usa ka propesyonal ug kasaligan nga pwersa sa kapulisan sa rehiyon.(IKEN B. GULLEM)
Source: Police Regional Office 9