Aron mapalig-on ang kahibalo ug kahandurawan sa kabatan-onan, nagpahigayon og information lecture ang Salug Municipal Police Station (MPS) kauban ang Rural Health Unit (RHU) Salug, kaniadtong Disyembre 28, 2025, sa Barangay Fatima, Salug Zamboanga del Norte atol sa KKK General Assembly.
Kini gipangunahan ni PMSg Jarel A. Daquipil sa Salug MPS, ubos sa pagdumala ni PMAJ Alexie A. Palisoc, ug gitambongan usab sa RHU Salug nga girepresentahan ni Edel B. Lagare. Tumong sa maong aktibidad ang paghatag og mas lawom nga pagsabot sa mga batan-on bahin sa mga hulga nga makaapekto sa ilang panglawas ug kaugmaon.
Gihisgutan sa lecture ang mga isyu sa sayong pagmabdos sa tin-edyer, HIV/AIDS, ug ang kampanya kontra iligal nga droga pinaagi sa BIDA Drug Awareness. Gihatagan og gibug-aton ang kahinungdanon sa husto nga pagpili sa mga buhat, pag-atiman sa kaugalingong panglawas, ug paglikay sa mga bisyo nga makadaot sa kinabuhi.
Sumala sa mga organizer, ang maong kalihokan kabahin sa padayon nga paningkamot sa kapulisan ug lokal nga panglawas aron maprotektahan ang kabatan-onan ug maandam sila sa usa ka responsableng papel sa komunidad. Gilauman nga pinaagi sa maong lecture, mas mahimong alerto ug responsable ang mga batan-on sa pag-atubang sa mga hagit sa ilang edad ug panahon.(IKEN B. GULLEM)
Source: Salug Municipal Police Station