DIPOLOG CITY — Nakadawat og shelter assistance ang 22 ka pamilya nga naapektuhan sa sunog sa Barangay Turno kaniadtong Hunyo 14, isip kabahin sa paspas nga paghatag og tabang sa Provincial Government of Zamboanga del Norte pinaagi sa Provincial Social Welfare and Development Office (PSWDO).
Gipahigayon ang distribusyon sa ayuda sa Turno Covered Court diin temporaryong nagpabilin ang mga apektadong pamilya. Ang maong kalihokan gihimo ubos sa direktiba ni Governor Darel Dexter T. Uy aron masiguro nga adunay madawat nga suporta ang mga biktima samtang nag-atubang sa epekto sa sunog.
Base sa report, 16 ka panimalay ang totally damaged ug usa ka balay ang partially damaged, nga nakaapekto sa 17 ka households nga gilangkuban sa 22 ka pamilya. Nanguna sa pagpanghatag sa ayuda si April Rose O. Salaveria sa PSWDO, kauban ang mga opisyal sa Barangay Turno nga gipangulohan ni Kapitan Ramonito G. Barbaso.
Sumala sa barangay, ang sunog nagsugod sa usa ka panimalay ug dali nga mikatag ngadto sa nagtapad nga mga balay. Bisan pa sa kadaot nga nahitabo, nagkahiusa ang barangay ug mga ahensya sa gobyerno sa paghatag og agarang tabang sa mga naapektuhan.
Gipasalamatan ni Kapitan Barbaso ang provincial government alang sa shelter assistance ug relief goods nga gihatag sa mga biktima, samtang nagpadayon ang mga paningkamot aron matabangan silang makabangon ug makasugod pag-usab.(JENIFFER JR. DELICA)
Source: Zamboanga del Norte Provincial News Network