Malipayong nakadawat ang 22 ka mga “housemates” sa Dipolog City Balay Silangan (DCBS) og food packs gikan sa kagamhanang lokal sa Dipolog nung Pebrero 23 ning tuiga.
Ang nasangpit nga food packs ang gihatag isip gamay’ng pahalipay ngadto sa mga “housemates” kinsa kasamtangan nga gipa-ilawom sa Community-based Rehabilitation Program nga nagsugod niadtong miaging semana.
Si Mayor Darel Dexter T. Uy mao ang personal nga mi-apod-apod sa nahisgutan nga pahalipay uban sa pagdasig sa mga “housemates” nga mosalig kanunay sa Ginoo ug likayan na ang mga dili maayong buhat. Nanghinaot ang mayor nga dunay nakat-onan ang mga “housemates” dinha sa Balay Silingan aron molambo ang ilang kinabuhi.
Samtang usa sa mga “housemates” ang mipadayag sa iyang pagpasalamat ngadto ni Mayor Uy ug sa tanang nagpaluyo sa programa sa “Balay Silangan” tungod kay sulod sa walo( ka adlaw nga sila mipa-ilawom sa rehabilitasyon, nalamdagan ang ilang huna-huna ug sila nakasabot na sa tumong sa maong programa. Dugang niini, nga sa ilang pagpuyo sa Balay Silingan, nabati nila nga sila dunay importansiya ug gi-isip sila sa gobyerno nga pamilya.
Nasayran nga sa umaabot Marso 1 ning tuiga, mogawas na ang 22 ka “housemates” sa Balay Silangan ug gikatakdang pa-apilon na usab sa mga livelihood ug skills training aron kini maoy magamit nila sa ilang panginabuhi.
Kauban ni Mayor Uy sa pagpanghatag sa food packs mao si LSDEC Operations Manager, Ms. Flora A. Atamosa.
(Source: CIO | Dipolog City Government Facebook page)