Nagkahiusa ang Provincial Government of Zamboanga del Norte (PGZN) ug ang Local Government Unit of Sibuco sa pagpahigayon og mangrove tree planting activity sa Barangay Cawit-Cawit niadtong Marso 11, diin kapin 1,000 ka mangrove propagules ang gitanom sa baybayon.
Kini nga kalihokan kabahin sa programa sa probinsya nga nagtumong sa pagpalig-on sa proteksyon sa kabaybayonan batok sa epekto sa climate change ug mga kalamidad sama sa storm surge ug coastal erosion.
Gipasiugdahan ang maong aktibidad sa Provincial Disaster Risk Reduction and Management Office ug Provincial Environment and Management Office ubos sa liderato ni Gov. Darel Dexter T. Uy.
Mitambong usab ang mga opisyales sa lungsod sa Sibuco, mga ahensya sa gobyerno, ug mga residente sa barangay nga nagtinabangay sa pagtanom aron mapreserbar ang kalikupan ug mapalambo ang marine ecosystem sa lugar.(IKEN B. GULLEM)
Source: Zamboanga del Norte Provincial News Network