“Dakong garbo sa probinsya sa Zamboanga del Norte nga maoy host sa 2025 Perlas ng Silangan Basketball League National Finals.” Mao kini ang tipik sa mensahe ni Governor Rosalina “Nanay Nene” Jalosjos nga gipabati ni Hon. Sushmita Jalosjos, President Liga ng mga Barangay sa Zamboanga del Norte ug Ex-Officio Member sa Sangguniang Panlalawigan atul sa pagbukas sa maong kalihukan,Enero 15, sulod sa Zamboanga del Norte Convention and Sports Center.
Dugang sa mensahe ni Governor Jalosjos nga sa maong kalihukan, mapasundayag ang probinsya isip maayong lugar alang sa paugnat sa kusog.
Gipahinumduman ni Governor Jalosjos ang mga magdudula sa basketball nga kanunay mosagup sa teamwork, sportsmanship ug ang disiplina sa matag usa. Ingon man, ang inahan sa probinsya nagkanayon usab nga sa maong kalihukan, saulogon ang kalampusan sa matag team, respetohan ang maong kompetisyon, ang mga coaches ug sa mga tambag niini ug daygon ang mga hurado, referees ug opisyales sa maong basketball national league.
Gihimo usab ang 3-point shoot-out competition kinsa ang nahimong Champion mao si Themor Aslam, 31 anyos, taga Mati City, Davao Oriental ug gikan sa JHIM G Farm tali sa ubang upat ka team. Si Aslam nakadawat ug P2,000 nga premyong cash.
Samtang sa Slam Dunk Competition nahimong Champion mao si John Carl Cabuga, 24 anyos, taga Balingasag, Misamis Oriental ug gikan sa Team ARNO Cagayan de Oro City.
Si Gerson “Buddy” Cagbabanua, ang Provincial Sports Coordinator ang mipasabot nga adunay lima ka team ang magsangka ning maong National Finals gumikan kay na conflict usab kini sa Regional Meet sa ilang mga lugar. Ang magsangka mao ang ARNO CDO LBJ Dipolog, JHIM Dapitan, JT Sports/Ian Realiza Polanco ug Qualitech Iloilo.
Niini, gidapit ni Cagbabanua ang publiko sa pagsaksi sa maong Basketball National Finals Enero 16-19 niining tuiga sulod sa ZN Convention and Sports Center. (Angelica T. Obina)
(Source: PIC- Sheng Jumalon Bala)