Mipahigayon og pagpang-apod-apod og Food Pack’s ang Lokal nga Pangagamhan sa Dakbayan sa Dapitan, ngadto sa sakop niini nga 2 ka Barangay, ang barangay Tag-ulo ug ang Barangay Banbanan, sugod niadtong Setyembre 09, hangtod niadtong nakalabay’ng, Setyembre 10, ning tuig 2025.
Tungod sa nasangpit nga Programa, mapasalamaton ang mga benepisyaryo sa maong ayuda ug ilang gi-padayag ang ilang dakong pagpasalamat sa gibuhat nga pag-paningkamot nila ni 1st District Congressman Roberto “Pinpin” Uy Jr. ug sa ni Mayor Evelyn T. Uy, nga nakadangat kanila ang naasoy nga mga Food Pack’s.
Sa mensahe nga giluwatan ni Mayor Uy, atol sa pag-apod-apod sa maong mga Food Pack’s, niadtong nakalabay’ng adlaw, nga matud la niini, naningkamot ang Dakbayan sa Dapitan nga ang tanang ayuda gikan sa nasyonal ug lokal nga pangagamhanan, makadangat gyud matud pa, sa mga katawhan.
Dugang pa niini nga, paningkamotan nilang masugdan ang programa sa bugas nga tag Php20.00 lamang ang matag kilo sa dili pa matapos ang tuig 2025, pinaagi sa pagtambayayong ug panaghiusa sa Kagamhanang Probinsyal ug Lokal sa Dapitan, lakip na niini, ang tabang usab sa City Agriculture Office.
Nasayran nga sa maong aktibidad, anaa usab ang suporta sa mga representante gikan sa 1st Congressional District sa Zamboanga del Norte, DSWD Regional Office, ug CSWD nga nagtinabangay aron masiguro nga ang ayuda mahatod sa tinuod nga nanginahanglan.
Dugang pa niini, nga gisiguro sa Kagamhanang Lokal sa Dapitan, nga ang Food Pack’s Distribution Program, mahatod ngadto sa 41 ka Barangay, aron ang mga rehistrado ug napamatud-an nga mangingisda makadawat gayud sa ayuda.
Matud pa, ang maong kalihukan dili lamang ayuda kondili simbolo usab sa pagkahiusa tali sa lokal nga pangagamhanan, mga Barangay, ug mga ahensya sa gobyerno aron masiguro nga walay mabiyaan.
Padayon ang paningkamot sa Kagamhanang Lokal sa Dapitan sa paghatod ug Inklusibo, Matinud-anon, ug Makiangayon nga pag-alagad alang sa mga Dapitanon.(Julius Esmade)