Gidakop sa kapulisan ang usa ka 81-anyos nga lalaki human kini gipasanginlan nga mitigbas sa ulo sa usa ka 47-anyos nga lalaki sa Barangay Bonbon, Samboan, Cebu niadtong nakalabay nga gabii.
Base sa imbestigasyon, nahitabo ang insidente alas 7:50 sa gabii dihang miadto ang biktima sa balay sa suspetsado kauban ang asawa niini. Sa dihang nakita sila sa suspetsado, nasuko ug nasina kini ug kalit nga giatake ang biktima gamit ang usa ka hait nga hinagiban. Naangol ang biktima sa nawong ug giingong gipuspos usab sa ulo gamit ang usa ka gahi nga butang.
Dali nga gidala sa mga responder sa Local Disaster Risk Reduction and Management Office (LDRRMO) ang biktima ngadto sa Malabuyoc District Hospital aron matambalan sa iyang mga samad.
Human madawat ang report alas 8:20 sa gabii, dali nga miresponde ang mga pulis sa Samboan Municipal Police Station ug ilang gidakop ang suspetsado. Karon anaa na kini sa kustodiya sa kapulisan samtang gipadayon ang imbestigasyon ug pag-andam sa kasong Frustrated Homicide batok kaniya.
Gipasidunggan ni CPPO Provincial Director PCOL Abubakar Udang Mangelen Jr. ang paspas nga aksyon sa mga polis sa Samboan. Matud niya, nakatabang ang ilang dali nga pagresponde aron dili na modako pa ang kagubot ug aron madala dayon sa kustodiya ang suspetsado.
📸 CPPO
I via Renante Socia Lada