Nasikop ug nakumpiskahan ug mukabat sa 10 ka gramo sa gidudahang marijuana ang usa ka 18 anyos nga lalaki atol sa gikasa nga hiniusang drug buy-bust operation sa mga tinugyanan sa balaod mga alas 9:52 sa gabii niadtong Agosto 24, 2026, didto sa Barangay Turno, Dipolog City, Zamboanga del Norte.
Ang maong dinakpan naila nga usa ka bag-ong drug personality kinsa nakuhaan sa nasangpit nga 10 ka gramo sa gituohang marijuana nga nagkantidad ug P1,200.
Ang pagkakumpiska sa nasangpit nga marijuana ug pagkadakop sa suspek gihimo pinaagi sa mga personahe sa Zamboanga del Norte Provincial Drug Enforcement Unit (ZNPDEU), uban sa koordinasyon sa Dipolog City Police Station (Dipolog CPS) ug sa 901st Maneuver Company, Regional Mobile Force Battalion 9 (901st MC-RMFB9).
Atol sa operasyon nakuha sa mga otoridad ang selyado nga transparent plastic sachet nga adunay sulod nga pinaugang dahon sa gidudahang marijuana, nga giila nga buy-bust item, uban sa P1,000.00 nga marked buy-bust money.
Ang nasakmit nga ilegal nga marijuana gidala ngadto sa Zamboanga del Norte Provincial Forensic Unit alang sa inisyal nga pagtimbang ug eksaminasyon.
Samtang ang suspek anaa karon sa kustodiya sa Dipolog CPS alang sa hustong dokumentasyon ug angay nga legal nga disposisyon.(MEDALYN U. BORJA)
Source: ZNPPO