Tingkagol karon sa prisohan ang usa ka suspetsado sa pagpandunggab sa usa ka 17 anyos nga menor de edad didto sa Roadside Bar, Barangay Ramos, Sta. Filomena, ning dakbayan sa Dipolog mga 8:30 sa buntag, Sabado, Mayo 18, 2024.
Naila ang suspek nga si REMARC MARINAY MEDINA alyas “Mak-Mak”, 22 anyos, lalaki, ug residente sa Purok Silangan, Estaka, ning syudad sa Dipolog City, samtang ang biktima nga menor de edad giila nga si RHIAN MARTISANO BINONDO, 17 anyos, ug residente sa Purok Tonggo, Brgy. Minaog, dakbayan sa Dipolog.
Matod sa mga otoridad mga alas 8:30 sa buntag nianang adlawa, nakadawat sila ug taho gikan sa usa ka concerned citizen kabahin sa nahitabong pangpanunggab nga nahitabo sa Roadside Bar, Ramos village, Sta. Filomena, dakbayan sa Dipolog ug gilayon kini ilang girespondehan.
Sa inisyal nga imbestigasyon,nasayran nga nag-inom ang biktima uban sa iyang mga higala sa Roadside Bar nga nahimutang sa barangay Ramos, Sta. Filomena, dakbayan sa Dipolog, dihang duha ka lalaki ang mitungha sa ilang lamesa ug gihagit ang biktima nga mag-away sa gawas sa bar.
Usa sa mga kauban sa mga biktima nga si Jhonlie Rasobnale Atab niila sa duha ka lalaki nga sila si Johnryll V. Lood ug Jeros Torres, iya dayong giingnan nga mohunong ug dili kini ang saktong lugar para makig-away.
Ug diha migawas ang duha ka lalaki, apan, pipila ka gutlo ang milabay, si Johnryll V. Lood mibalik kanila ug gihagit na usab ang biktima nga mag-away.
Nakahukom sila nga mopauli aron makalikay sa kasamok, apan sa dihang didto na sila sa gawas, gisumbag sa wala mailhing tawo ang biktima ug ang laing usa nagsul-ob og blue nga t-shirt nga adunay itom nga stripes, ug hugaw nga puti nga long pants, gidunggab ang biktima gamit ang kutsilyo nga maoy dayon gidala sa Corazon C. Aquino Hospital aron matambalan.
Tungod sa maong hitabo,ang Beat patroller nga personahe sa PNP nga si PSSg Loyd Angilu L. Carpitanos ug PCpl Elmer H Enderez, mipahigayon ug paggukod ug nadakpan ang suspek, ug narekober gikan sa possession niini ang usa ka kutsilyo nga gisuksok sa iyang hawak nga gituohang mao ang hinagiban nga gigamit sa pagpanunggab nga positibo usab nga giila sa biktima ug gitumbok nga responsable sa pagdunggab kaniya.
Gidala dayun ang suspek sa estasyon alang sa temporaryo nga detensyon ug gideposito ang kutsilyo alang sa tukma nga disposisyon. (Medalyn U. Borja)
(Source: Dipolog CPS)