Mipahimulos sa Local Government Support Fund–Financial Assistance to Local Government Units (LGSF-FALGU) Rice Distribution Program ang 1,650 ka Dapitanong pamilya nga nakadawat og tig-10 ka kilo nga bugas sa mass distribution nga gipahigayon sa JRMSU Gymnasium.
Ang maong ayuda kabahin sa Assistance to Indigent Individuals or Families–Food Assistance (AIIF-FA) nga programa sa nasyonal nga gobyerno ubos sa administrasyon ni Presidente Ferdinand R. Marcos Jr., nga nagtumong sa paghatag og tabang sa mga pamilyang nanginahanglan ug pagpalig-on sa food security.
Gipatuman ang programa pinaagi sa panagtambayayong sa Department of Social Welfare and Development (DSWD), Provincial Government of Zamboanga del Norte, Department of the Interior and Local Government (DILG), ug sa Local Government Unit (LGU) sa Dapitan.
Kini nga inisyatiba nagtumong sa pagpagaan sa adlaw-adlaw nga gastohan sa mga benepisyaryo pinaagi sa direktang paghatag og food assistance ngadto sa mga komunidad.
Nagpasalamat usab ang mga nakadawat sa tabang, nga ilang giingong dako og ikatabang sa pagsiguro sa pagkaon sa ilang pamilya.(IKEN B. GULLEM)
Source: Dapitan City Government