Nakadawat ang 161 ka benepisyaryo nga biktima sa bag-ong pagbaha ug ₱9,000 nga livelihood gift certificates ubos sa Pangkabuhayan sa Pagbangon at Ginhawa (PPG) Program sa Department of Trade and Industry (DTI) atol sa usa ka distribusyon nga gipahigayon sa Poblacion, Siocon, Zamboanga del Norte.
Ang dispersal sa ayuda gipangulohan ni DTI Regional Director Al-Zamir I. Lipae, kauban si DC Raymunda B. Biolango, Former DSWD Asec. Jade T. Jamalod, ug si Siocon Mayor Ceasar C. Soriano, uban ang ubang mga opisyal sa rehiyon.
Sa pagsugod sa kalihukan, gihatagan ni Mayor Soriano ug mainitong pagdawat ang tanang partisipante, samtang gipasabot ni Director Lipae ang padayon nga paninguha sa DTI sa pagpalig-on sa mga komunidad pinaagi sa livelihood support, ilabina sa mga apektado sa kalamidad. Gisundan kini sa mensahe ni Asec. Jamalod nga nagdani sa kahinungdanon sa government convergence ug malungtarong paglambo alang sa katawhan sa Siocon.
Gidayeg usab sa DTI ang determinasyon sa mga benepisyaryo nga makabangon, ug giawhag sila sa pagpadayon sa pag-develop sa ilang panginabuhi pinaagi sa kitang ilang nadawat.(IKEN B. GULLEM)
Source: DTI R9