Gipahigayon sa Philippine Institute of Civil Engineers (PICE) ang 15th Region IX Technical Conference sa Zamboanga del Norte Convention and Sports Center sa Barangay Estaka niadtong Hunyo 18–19 aron mapalambo ang kahibalo, teknikal nga kahanas, ug propesyonal nga pag-uswag sa mga civil engineer sa Region IX.
Ang maong komperensya nagtigom sa mga civil engineer gikan sa nagkalain-laing probinsya sa rehiyon alang sa pagbinayloay og kahibalo, paghisgot sa bag-ong teknolohiya ug mga pamaagi sa civil engineering, ingon man sa paglig-on sa kooperasyon tali sa mga propesyonal sa industriya.
Gipasiugdahan sa PICE Dapitan-Dipolog Chapter ang kalihokan nga adunay temang “PICE Towards a Sustainable Future: Strengthened by Members, Defined by Specialization,” nga nagpunting sa pagpalambo sa espesyalisasyon, inobasyon, ug malungtarong imprastraktura.
Mitambong sa maong technical conference ang mga opisyal sa PICE sa nasyonal ug rehiyonal nga lebel, lakip si National President Engr. Nerie D. Bueno, uban sa ubang mga lider sa organisasyon ug mga civil engineer gikan sa tibuok Zamboanga Peninsula.(IKEN B. GULLEM)
Source: Dipolog City Government