I-deploy sa 12 ka public elementary schools sa Dapitan City ang 150 ka kolehiyo nga estudyante gikan sa Jose Rizal Memorial State University (JRMSU) isip mga tutor ug youth development workers ilawom sa “Tara, Basa! Tutoring Program” sa Department of Social Welfare and Development (DSWD).
Gisugdan na sa DSWD, Local Government Unit sa Dapitan, ug JRMSU ang interview ug validation sa mga aplikante atol sa kalihokan nga gihimo sa CNAHS Audio-Visual Hall sa JRMSU Dapitan. Tumong niini nga mapili ang mga kwalipikadong estudyante nga motabang sa mga kabataang adunay kalisod sa pagbasa ug sa mga non-reader.
Ang programa naghatag og cash-for-work nga oportunidad sa mga estudyante samtang nagpalig-on sa literacy sa mga elementarya. Kabahin usab niini ang mga sesyon alang sa ginikanan ilawom sa “Nanay–Tatay Teacher” approach aron mapalalom ang partisipasyon sa pamilya sa pagkat-on sa mga bata.
Ang “Tara, Basa!” usa ka community-based nga inisyatiba sa DSWD nga nagtinguha nga mapaayo ang kalidad sa edukasyon ug mapalambo ang partisipasyon sa kabatan-onan sa Bag-ong Dapitan.(IKEN B. GULLEM)
SOURCE: CITY GOVERNMENT OF DAPITAN