Nagkahiusa ang 13 ka konseho sa Lokal nga Gobyerno sa Sindangan sa ilang 4th Quarter Meeting nga gihimo sa Front View Deck sa Sindangan People’s Cultural and Sports Center niadtong Disyembre 4, 2025, gikan alas-10 sa buntag hangtod alas-5 sa hapon.
Gipangulohan kini ni Mayor Glona G. Labadlabad, diin matag konseho mipresentar sa ilang mga nahuman nga kalihokan ug mga plano, programa, ug prayoridad nga aktibidad. Lakip sa mitambong mao ang Municipal Development Council, Peace and Order Council, Anti-Drug Abuse Council, Task Force to End Local Communist Armed Conflict, Council for the Protection of Children, GAD Focal Point System, Local Health Board, Nutrition Council, Integrated Water, Sanitation and Hygiene, Local Committee on Anti-Trafficking & VAWC, Local School Board, Disaster Risk Reduction and Management Council, ug Solid Waste Management Council.
Gipresentar usab sa Municipal Planning and Development Office sa pagpanguna ni Ma’am Maybelle Cabañog ang Comprehensive Land Use Plan (CLUP) 2023–2035, nga naglatid sa giya ug estratehiya alang sa hapsay ug mabuligon nga pagpalambo sa lungsod.
Nagpamatuod ang miting sa tinud-anay nga tinguha sa LGU Sindangan alang sa tinud-anay nga pagdumala ug lig-on nga panaghiusa sa tanang konseho aron mapaabante ang usa ka luwas, himsog, ug mas mauswagong komunidad.(JENIFFER JR. DELICA)
Source/Photo Courtesy: Local Government Unit of Sindangan