Mokabat sa 11 ka barangay kapitan ug konsehal sa ikaduhang Distrito sa Zamboanga del Norte ang nakaangkon og libreng medical check-up ug laboratory services sa Cebu City niadtong Pebrero 18, isip unang batch sa gipahigayon nga health initiative alang sa mga lokal nga lider.
Ang mga opisyales gipadala ni Congresswoman Irene Labadlabad ug Sindangan Mayor Glona Labadlabad aron masiguro nga mahatagan sila og hustong pag-atiman sa panglawas samtang nagpadayon sa ilang pagserbisyo sa katawhan.
Sa maong check-up, ilang napahimuslan ang libreng blood testing, blood pressure monitoring ug general physical examination. Kini nga kalihokan giatiman sa ZNMC Medical Team nga maoy nag-organisa ug nagkoordinar sa biyahe ug medical services sa delegasyon.
Sumala sa mga tigpasiugda, importante nga ang mga lider sa barangay magpabiling himsog aron mas epektibo nilang matuman ang ilang responsibilidad sa komunidad. Ang inisyatiba gipaluyohan usab ni Governor Darel Dexter T. Uy, kabahin sa mas lapad nga paningkamot sa pagpalig-on sa preventive healthcare ug wellness sa probinsya.(IKEN B. GULLEM)
Source: Zamboanga del Norte Provincial News Network