Pormal nga giturn over sa Department of Information and Communications Technology (DICT) ang 1,006 ka Bayanihan SIM cards ngadto sa mga benepisyaryo nga 4Ps students ug faculty sa Ponot National High School niadtong Pebrero 2, 2026.
Kini nga turnover nagtimaan sa dakong lakang sa pagpalig-on sa digital education sa eskwelahan, ilabi na sa mga tinun-an ug magtutudlo nga naglisod sa internet connectivity. Ang matag SIM card adunay 25GB nga data matag bulan sulod sa usa ka tuig, nga magamit sa online research, digital learning platforms, ug virtual classes.
Sumala sa DICT, ang inisyatiba kabahin sa Digital Bayanihan Program, nga nagtumong sa pagwagtang sa digital divide ug pagsiguro nga walay estudyante nga mapabilin tungod lang sa kakulang sa access sa internet.
Pinaagi sa maong turnover, gilauman nga mas mapalapad ang kahigayonan sa kalidad nga edukasyon sa Ponot NHS, uyon sa mensahe nga “Sa Digital Bayanihan, Walang Pilipinong Maiiwan.”(IKEN B. GULLEM)
Source: DICT IX BASULTA