Mipasabot ang Cebu Provincial Government nga gikan sa lima nisaka na ngadto sa napulo ang gidaghanon sa mga ospital nga naghatag og 24/7 clinical laboratory services sulod lang sa lima ka bulan. Kini usa ka dakong kalamboan sa tinguha sa probinsya nga mapalig-on ang kahimsog sa mga Sugboanon.
Sumala ni Gov. Pamela Baricuatro, ang pagdugang sa mga pasilidad nga bukas tibuok adlaw ug gabii usa ka dakong bahin sa iyang health reforms aron mapadali ang emergency medical response sa tibuok probinsya. Gipasabot usab ni Dr. Nikki Catalan, Capitol Piso Health Consultant, nga ang mga ginagmay ug padayon nga kausaban nagpakita nga misaka ang kapasidad sa healthcare system sa Sugbo.
Ang lima ka dugang ospital nga karon nag-operate og 24/7 diagnostic services mao ang district hospitals sa Bantayan, Barili, Camotes, Minglanilla, ug Oslob. Gikan sa 5 lamang ka ospital sa Hulyo 2025, karon nisaka na sa 10 gikan sa 16 ka ospital ang adunay full-time laboratory operationsāpagsaka gikan sa 31% ngadto sa 62.5%.
Gipasabot ni Dr. Catalan nga ang programa dili lang numero ang tumong, kundi ang tinuod nga epekto sa kinabuhi, kay ang 24/7 laboratory access nagpasabot og mas paspas nga diagnosis ug mas maayo nga pag-atiman ilabina sa mga emerhensiya. Usa kini ka lakang aron masiguro nga ang tanang ospital sa probinsya adunay medical technologists nga makaresponde bisan unsang orasa.
Ang uban pang ospital nga dugay nang nag-operate og 24/7 laboratory services mao ang provincial hospitals sa Bogo, Danao, ug Carcar, ug district hospitals sa Balamban ug Argao. Mitug-an si Dr. Catalan nga unom pa ka ospital ang kinahanglan og pag-upgrade, apan padayon ang paningkamot aron maabot ang 100% 24/7 laboratory coverage sa tanang Capitol-run hospitals.
Source: Cebu Province PIO
I via Renante Socia Lada