Gipangulohan ni Cebu Governor Pamela Baricuatro ug DILG Cebu Provincial Director Jesus Robel Sastrillo Jr. ang ikaduhang hugna sa “Dagyawan sa Barangay” nga gipahigayon sa Deo Durano Sports and Cultural Complex sa Sogod, Cebu, niadtong Martes, Disyembre 9, 2025. Ang unang Dagyawan gipahigayon sa Tuburan niadtong Disyembre 1.
Usa sa mga nag-unang bahin sa maong kalihukan mao ang pagbukas sa “Dagyawan sa Barangay” peace pole nga adunay mensaheng “May Peace Prevail on Earth”, nga nagtimaan sa paningkamot sa probinsya nga mapalapdan ang kalinaw ug panaghiusa sa mga komunidad.
Gipakita usab sa aktibidad ang pagpatuman sa Retooled Community Support Program (RCSP), usa ka inisyatiba sa Department of the Interior and Local Government (DILG) nga nagtumong sa pagresolbar sa mga isyu sa komunidad, pagtangtang sa kakulang sa lokal nga pagdumala, ug pagpalig-on sa kalinaw pinaagi sa paghatod sa nag-unang serbisyo publiko ngadto sa mga barangay, ilabina kadtong naigo sa kagubot o nanginahanglan pa og dugang kalambuan.
Atol sa maong adlaw, ang DILG Sugbo mitanyag og libre nga legal consultations, medical checkups, ug uban pang batakang serbisyo alang sa mga residente sa Sogod.
Source: Cebu Province PIO
I via Renante Socia Lada