Malampuson ang gihimong medical mission sa pakigtambayayong sa Mandaue City Government ug ni Sen. Raffy Tulfo niadtong Disyembre 9 sa Mandaue City Cultural and Sports Complex, diin nagtinabangay ang duha ka sektor aron hatagan og libreng serbisyo ang katawhan.
Kapin 200 ka residente ang nakapahimulos sa libreng konsultasyon ug check-up gikan sa giandam nga 400 ka slots nga gipanghatag pinaagi sa first come, first served nga pamaagi. Matud sa mga organizers, daghan pa unta ang miapil apan limitado ang gidaghanon sa makaserbisyo sa usa ka adlaw.
Ang maong medikal nga kalihukan nagtumong sa pagtabang sa mga Mandauehanon nga nanginahanglan og libreng tambal ug primary healthcare services. Lakip sa mga gitanyag nga serbisyo mao ang medical consultation, X-ray, blood test, blood sugar check, ECG, ug urinalysis.
Nagpadayag sa dakong pagpasalamat ang mga benepisyaryo sa natabang kanila, ilabi na kadtong walay igong budget alang sa medical check-ups. Uban sa libre nga serbisyo, daghan ang nakaingon nga natabangan sila nga mas masayud sa ilang kahimtang sa panglawas.
Gilauman sa lokal nga kagamhanan nga pinaagi sa mga ingon ani nga programa, mas daghan pang katawhan sa Mandaue ang maabot sa paspas ug libre nga healthcare nga makahatag og kahupayan ug proteksiyon sa panglawas.
I via Renante Socia Lada