Opisyal nang napanag-iya sa City Government of Dapitan ang titulo sa 1.4-ka ektaryang lote sa Barangay Linabo, Dapitan city, usa ka dakong lakang aron matukod ang dugay nang gilauman nga bag-ong public market sa syudad.
Gidawat ni Mayor Evelyn “Belen” T. Uy ang titulo sa yuta nga nagkantidad ug ₱32.7 milyon, lakip na ang tanang bayronon ug papeles. Ang kompletong pagpanag-iya niini nagtimaan sa pagsulbad sa dugay na nga isyu sa lokasyon ug legalidad sa merkado publiko, nga nahimong hagit sa daghang administrasyon.
Matud ni Mayor Belen, ang pagkab-ot sa titulo maoy unang tukma ug klarong lakang sa tinuod nga kauswagan, ilabi na sa paghatag ug limpyo, organisado, ug mas angay nga lugar sa mga magtinda ug mamalitay.
Giangkon sa City Government nga ang maong yuta dili lang simbolo sa progreso apan ebidensya sa malinaw ug responsableng pangagamhanan nga gisunod sa kasamtangang administrasyon.
Padayon ang paningkamot sa syudad ubos sa liderato ni Mayor Uy aron ang mga proyekto dili lang kutob sa saad, kundili mahimong konkreto ug makatabang sa katawhan sa Dapitan.(IKEN B. GULLEM)
Source: City Government of Dapitan