Mokabat sa liboan ka motorcab drivers sa Dapitan City ang nakadawat og ₱5,000 nga fuel subsidy isip tabang sa pagsaka sa presyo sa krudo nga nakaapekto sa ilang adlaw-adlaw nga kita.
Gipahigayon ang payout sa Covered Court sa Dapitan City Central School pinaagi sa lokal nga pangagamhanan, kauban ang City Social Welfare and Development (CSWD) ug Department of Social Welfare and Development (DSWD).
Sumala sa LGU, ang subsidy gituyo aron mamenosan ang gasto sa operasyon sa mga drayber ug masiguro ang padayon nga serbisyo sa transportasyon alang sa publiko bisan pa sa taas nga presyo sa gasolina.
Usa sa mga benepisyaryo, si Cesar S. Tamparong Jr., usa ka lider sa motorcab drivers, miingon nga dako kaayo ang tabang sa maong ayuda ilabi na karon nga lisod ang panginabuhi tungod sa mahal nga krudo.
Kini nga programa kabahin sa mas lapad nga paningkamot sa gobyerno aron suportahan ang sektor sa transportasyon ug matabangan ang mga drayber nga makapadayon sa ilang panginabuhi taliwala sa krisis sa ekonomiya.(IKEN B. GULLEM)
Source: City Government of Dapitan