Nakab-ot sa Police Regional Office 7 (PRO7) ang dakong kalampusan sa ilang gipakusgan nga kampanya batok ilegal nga sugal sa Central Visayas, human madakpan ang 452 ka mga indibidwal atol sa operasyon sulod sa bulan sa Marso. Gikumpiskar usab ang kantidad nga ₱65,943.00 nga gipangpusta sa nagkadaiyang ilegal nga sugal.
Sumala sa report, sa kinatibuk-ang gidaghanon sa nadakpan, 321 niini mga nitaya samtang 131 ang nagsilbing mga “usher” o tigkolekta sa pusta sa lain-laing ilegal nga kalihokan sa sugal.
Lakip sa mga nasikop mao ang number games diin ang mga partisipante mopili og numero nga ilang pustahan, nga kasagaran gidumala gawas sa regulasyon sa gobyerno.
Gipadayag usab nga adunay mga nadakpan nga nalambigit sa Cara y Cruz o mas nailhan sa lokal nga tawag nga “hantak,” ingon man sa ilegal nga mga dula sa baraha ug dili otorisadong sabong nga gihimo sa nagkalain-laing lugar sa rehiyon.
Tungod sa padayon nga operasyon, nakapasaka na og 238 ka kriminal nga kaso batok sa mga nadakpan ilalom sa Presidential Decree No. 1602, nga nagsilot sa tanang nalambigit sa ilegal nga sugal lakip na ang operators, collectors, maintainers ug bettors.
Si PRO7 Regional Director PBGen Redrico A. Maranan mipahimangno sa publiko bahin sa dautang epekto sa ilegal nga sugal, ilabi na sa kahimtang pinansyal sa mga pamilya.
Matud pa niya, bisan og gidani niini ang mga tawo pinaagi sa saad nga dali nga kwarta, kasagaran kini mosangpot sa kapildihan, utang ug kalisod sa kinabuhi.
Gipasalig sa PRO7 nga magpadayon ang ilang lig-on nga kampanya batok ilegal nga sugal sa tibuok Central Visayas isip kabahin sa mas halapad nga paningkamot sa Philippine National Police aron mapadayon ang kalinaw ug kahapsay sa komunidad ug maprotektahan ang katawhan gikan sa mga ilegal nga kalihokan.
Source: PRO7 PIO
I via Renante Socia Lada