Isip solusyon sa nagkagrabeng trapiko ug dili organisadong transportasyon, gilantad sa lokal nga pangagamhanan sa Jose Dalman ang plano sa pagtukod og ₱15 milyon nga bus terminal atol sa ika-47 nga anibersaryo sa lungsod niadtong Abril 7, 2026.
Gilauman nga ang maong terminal mahimong sentrong hulatanan sa mga pasahero ug sakyanan aron mapahapsay ang dagan sa biyahe, mapamenos ang kasamok sa dalan, ug mapalambo ang kaluwasan sa publiko.
Dungan niini, gilunsad usab ang ubang proyekto sama sa ₱5 milyon nga rehabilitasyon sa municipal gymnasium ug ₱10 milyon nga fish landing facility, nga maghatag og dugang oportunidad sa sports, kalihokan sa komunidad, ug panginabuhian sa mga mangingisda.
Sumala sa mga opisyal, ang pagpalambo sa transport infrastructure usa ka lakang aron mapakusog ang lokal nga ekonomiya ug mas mapadali ang paglihok sa mga tawo ug produkto sulod ug gawas sa lungsod.(IKEN B. GULLEM)
Source: Zamboanga del Norte Provincial News Network