Giandaman ug ₱5 milyon nga pondo aron mapalig-on ang digital ug creative industry sa Dapitan City pinaagi sa bag-ong Dapitan Digital Immersive Creative Ecosystem o DICE–Shared Service Facility (SSF) niadtong Septiyembre 14,2026.
Sa maong kalihokan pormal nang nakigsabot ang Department of Trade and Industry Region 9 (DTI-IX) ug Jose Rizal Memorial State University (JRMSU) niadtong Septiyembre 14, 2026 alang sa pagpatuman sa maong proyekto sa JRMSU Main Campus sa Dapitan.
Gipirmahan ang kasabutan ubos sa pagpangulo ni DTI-IX Regional Director Al-Zamir I. Lipae ug JRMSU President Dr. Maria Rio Abdon Naguit, isip lakang sa paghiusa sa gobyerno ug academe alang sa mas lig-on nga creative industry sa Dapitan.
Pinaagi sa Dapitan DICE, hatagan og mas lapad nga access sa modernong digital ug immersive technologies, kagamitan ug support services ang mga local creative, MSMEs, estudyante ug uban pang stakeholders.
Tumong sa proyekto nga dili lamang mapalambo ang digital skills, kundili usab mapadako ang oportunidad sa mga lokal nga talento ug negosyo nga makasulod ug makakompetensya sa nagkadako nga creative economy.(MEDALYN U. BORJA)
Source: DTI Zamboanga del Norte