Usa ka gitumong nga deep-water port sa Zamboanga del Norte ang gilista isip prayoridad nga proyekto sa Philippine Fishery Development Authority (PFDA) alang sa Fiscal Year 2026, nga adunay gibanabanaang kantidad nga ₱5 bilyon.
Sumala sa PFDA, ang proyekto nagtumong sa pagpalig-on sa imprastraktura sa sektor sa pangisda, pagpaayo sa transportasyon ug pagdumala sa mga produkto sa agrikultura ug agri-industriya, ug pagpalapad sa access sa merkado sa mga lokal nga magprodyus.
Isip unang lakang, magpatuman ang Technical Services Department (TSD) sa PFDA og mga teknikal nga kalihokan sama sa field ug engineering surveys, hydrographic surveys, ug komprehensibong site assessment aron masuta ang kahimtangan sa lugar ug ang kaangayan sa proyekto sa aspeto sa teknikal ug environmental.
Kabahin usab sa proseso ang pakigkonsultasyon sa mga mangingisda, fish traders, ug uban pang stakeholders pinaagi sa mga personal nga interbyu. Tumong niini ang pagkuha og tukmang impormasyon bahin sa operasyon sa pangisda, sitwasyon sa merkado, ug mga kakulangan sa kasamtangang imprastraktura aron masiguro nga ang proyekto motakdo sa tinuod nga panginahanglan sa komunidad.
Magahimo usab ang PFDA og canvass sa lokal nga mga materyales sa konstruksyon, pagbisita sa posibleng tinubdan sa construction aggregates, ug pagkolekta og dugang datos gikan sa mga magbabaligya ug mangingisda aron magamit sa hustong pagplano, costing, ug disenyo sa pantalan.(IKEN B. GULLEM)
Source: Zamboanga del Norte Provincial News Network