Dugang kalamboan ang nasinati sa mga residente sa Barangay Balok human sa opisyal nga turn-over sa duha ka imprastrukturang proyekto nga nagkantidad og kapin ₱16.8 milyon niadtong Martes, Hulyo 7.
Gilakip sa giturn-over ang road concreting project nga nagkantidad og ₱4,944,964.74 ug ang Farm-to-Market Road (FMR) project nga mibalor og ₱11,934,980.67, nga adunay kinatibuk-ang kantidad nga ₱16,879,945.24. Ang mga proyekto gipundohan pinaagi sa paningkamot ni Congresswoman Irene G. Labadlabad aron mapalambo ang imprastruktura sa ikaduhang distrito sa lalawigan.
Atol sa kalihokan, gidasig ni Governor Darel Dexter T. Uy ang katawhan sa pagpadayon sa panaghiusa, paghatag og prayoridad sa edukasyon sa kabataan, ug pagpaningkamot aron mapadayon ang kalamboan sa komunidad.
Gipasalamatan usab sa gobernador si Congresswoman Labadlabad sa pagdala sa mga proyekto sa barangay ug si Mayor Maiko Wong sa maayong panagtinabangay tali sa lokal ug probinsyal nga panggamhanan.
Gihisgutan usab ni Gov. Uy ang panginahanglan sa usa ka footbridge alang sa kaluwasan sa mga residente panahon sa pagbaha ug ang pagpalambo sa water system aron mas masuportahan ang mga panimalay ug ang sektor sa agrikultura.(IKEN B. GULLEM)
Source: Zamboanga del Norte Provincial News Network