Sugod karong adlaw’ng Sabado, June 5, gitugutan na sa National-Inter Agency Task Force on Covid-19 ang dine-in og limited face-to-face Church activities sa General Santos City.
Subay sa gipagawas nga guidelines, ilawom sa general community quarantine status sa siyudad, gitugutan ang pisikal nga pagtambong sa mga misa, apan limitado sa 30 percent ang attendance sulod sa Simbahan, aron mapatuman gihapon ang social distancing.
Gawas sa pag-abli sa mga Simbahan, gitugutan na usab ang dine-in sa mga restaurant ug food establishments, apan nagalimita gihapon sa 30 percent occupancy para sa mga close area ug 50 percent occupancy para sa mga anaa sa open area.
Una nag gianunsyo mismo ni Presidential Spokesperson Harry Roque, nga giaprubahan na sa National-IATF ang hirit sa city government sa pagpatuman sa mas istriktong quarantine measures.
Matod pa ni Roque, ipailawom sa GCQ ang siyudad, sugod June 5 hangtud June 30. (John Rey Somido)