Gitakdang makadawat ang kagamhanang panlalawigan sa Sugbo og P125 milyon nga hinabang gikan sa Department of Interior & Local Government kun DILG para sa rehabilitation sa kadalanan sa probinsiya.
Ang disbursement sa naasoyng alokasyon ipahigayon ubos sa Conditional Matching Grant to Provinces kun CMGP program sa DILG ug sa Department of Budget and Management (DBM) nga gitumong sa pagtabang sa mga LGU’s kun local government units pagpatuman sa mga infrastructure project sa tagsatagsa nila ka hurisdiksyon.
Sumala pa PIO kun Provincial Information Office, si Bernadette Camilo, coordinator sa DILG-7 CMGP, nakigtagbo kang Gob. Gwendolyn Garcia niadtong Marso 3 aron pagtuki sa implementasyon sa programa sa lalawigan.
Matod pa ni Camilo, ang P125 milyon nga gahin gamiton sa pagpaayo, pagpalambo ug pagpahiuli sa provincial roads.
Ug isip tugbang, ang Kapitolyo mogahin usab og maintenance funds nga usa ka gatos kalibo ka pesos sa matag kilometro nga maayum-ayom gamit ang pundo sa gobyerno.
Segun sa record, ang lalawigan nga giilang labing adunahang probinsya sa nasod adunay labing minos 315 ka kilometronga provincial roads.