Gibuksan Biernes, ang 2023 Division Festival of Talents (DFOT) nga gipasiugdahan sa City Schools Division, ning siyudad.
Ang nasangpit nga kalihukan ang nagtumong sa paghatag og oportunidad sa mga magtutungha sa elementarya ug sekondarya nga ipakita ang ilang talento, abilidad ug ubang pang kahanas sa aspeto sa kultura, sining ug teknolohiya nga mahimong magdala kanila ngadto sa kalampusan.
Sumala sa nasayran, kini maong kalihukan, unang gilusad niadtong 2019 apan na-suspende tungod sa pandemic og karon gibalik na usab aron mahatagan og higayon ang mga kabataan nga ma-umol ang ilang mga hiyas.
Ang kompetisyon naglangkob ning mosunod:
Sining Tanghalan, Technolympics, Read-A-Thon (English/Filipino), Population Development, STEMazing, SNED Expo ug Musabaqah diin kini pagasalmotan sa nagkalain-laing tulonghaan nga sakop ning dakbayan.
Ang pagbukas ning maong aktibidad gitambongan sa mga kadagkoan sa DepEd nga sila si SDS Dr. Liza R. Tabilon, Assist.SDS Dr. Luorma I. Poculan ug mga Education Program Supervisors kinsa mihatag usab sa ilang tagsa-tagsa ka mga mensahe.
Samtang si konsehal Marilou Y. Calibo, Chairman sa Komitiba sa Edukasyon sa Sangguniang Panlungsod, representante ni Mayor Darel Dexter T. Uy ang mi-apila sa mga magtutudlo nga kanunay’ng dasigon ang mga bata sa pagpalambo sa ilang mga talento ug gipa-abot usab niya sa mga “talented young learners” nga batonan kanunay ang “humility” o pagkamapa-ubsanon bisan kon makab-ot na niini ang kalampusan.
Ang 2023 Division Festival of Talents didto gipahigayon sa Galas National High School nga gidumala ni School Principal Jose Rey A. Adriatico.
(Source: Dipolog City Government Facebook page)