Cebu City – Mohimo og kaugalingong imbestigasyon ang Department of Education o DepEd-7 sa pagdasok sa mga tawo atol sa Suroy-Suroy, Sugbo stop sa Madridejos, Bantayan Island niadtong Biyernes, Nob. 27.
Suma pa ni Director Salustiano Jimenez ila nang gimandoan ang division office sa probinsiya paghulma og ‘fact-finding’ team.
Ang team, matod ni Jimenez, mohashas sa report nga gimandoan ang mga tinun-an paggawas sa balay nga mag-uniporme aron pag-abi-abi sa mga bisita sa event.
Giangkon ni Jimenez nga nakadawat silag impormasyon bahin niini hinungdang moapil sila sa imbestigasyon.
Midugang si Jimenez nga ilang tan-awon ang tukmang silot sa mga opisyal ug kawani sa ahensiya nga mapamatud-ang sad-an sa kontrobersiyal nga kalihokan.
Sa nasayran, ang Suroy-Suroy Sugbo sa Bantayan Island giuwan sa pagsaway sa mga netizens pagkakita sa hulagway ug video sa nagdasok nga mga tawo sa Kota Park sa Madridejos nga wa na magtamod sa physical distancing.
Ilang gidaot ang mga opisyal sa gobyerno lakip ni presidential spokesman Harry Roque nga wala magtagad sa maong isyu. (Jhon Tadlip/JTY, Contributed Photo)
(Source: DepEd-7)