Miabot og 70 ka motorista ang nadakpan sa mga sakop sa Land Transportation Office o LTO 7 tungod sa lainlaing kalapasan sa Transcentral Highway sa Brgy. Malubog, Cebu City sa milabayng adlaw.
Suma pa ni Director Victor Caindec, ang operation, nga hiniusang gihimo uban sa Regional Highway Patrol Unit o RHPU 7, nakaisyo og 74 ka TOP o temporary operator’s permit ngadto sa badlongong mga motorista.
Gawas sa mga naisyohan og TOPs, ang mga personnel sa LTO 7 pinangulohan ni Rafael Dominico Cortes ug Capt. Silvestre Cenia, Jr. sa RHPU naka-inspect og 80 ka awto ug 60 ka motorsiklo nga kompleto sa document sama sa official receipt (OR), certificate of registration (CR) ug driver’s license.
Sagad sa mga nadakpan nakalapas sa pipila ka lagda sa trapiko lakip sa illegal installing accessories sa ilang motorsiklo, pakyas nga pagmontar og seatbelt, pakyas nga pagda og OR ug CR; wala pagsul-ob og helmet sa pagmaneho, pakyas nga pagkuhag plaka, walay driver’s license, illegally altering sa motorcycle’s exhaust pipe, ug buak nga brake lights.
Human mabasa ang pipila ka komentaryo batok sa ilang operation sa social media, giawhag ni Caindec ang mga motorista pagreklamo sa iyang opisina inay nga magpataka lang og pamasangil batok sa iyang mga tawo. (Jhon Tadlip/JTY)
(Source & photo courtesy of LTO-7 | Dir. Victor Caindec)