El Departamento de Medio Ambiente y Recursos Naturales o DENR-Zamboanga Peninsula, por medio del Oficina de Medio Ambiente Comunitario y Recursos Naturales, o OCENR, del Guipos, ya dona 5,548.16 pies tablares de medara con cuatro escuelas na Bayog, Zamboanga del Sur, para suporta con el proyectos de componida y renovacion del mga escuelas.
Asegun con el oficina regional del DENR del Sabado, con el mga Madera ya distribui como el mga siguientes: Dipili Elementary School, 2,030 pies tablares; Damit Elementary School, 1,241 pies tablares; Bayog Central Elementary School-SPED, 1,229.33 pies tablares; y Camp Blessing Elementary School, 1,047 pies tablares.
Asegun con el DENR, el firmada del escritura de donacion ya hace del Martes na oficina del TVI Resource Development Philippines (TVIRD), Inc, na Bayog, Zamboanga del Sur.
El DENR ya habla, si Pacifico Cabrido, Jr., el diputado del CENRO-Guipos ya firma con el escritura de donacion en calor de Felipe Callorina, Jr., el jefe del CENRO-Guipos.
Asegun con el oficina regional del DENR, con el firmada del escritura de donacion ya man testigo el Alcalde Celso Matias del municipio de Bayog, y mga oficiales y representantes del DENR y del mga recipientes escuelas.
Asegun con el DENR, el mga madera ya entrega y ya hace el proceso el TVIRD bajo el “Special Tree Cutting and Earth Balling Permits” que ya dale el oficina regional del DENR del 2021 y 2022.
El iniciativa ta refleja el dedicacion del oficina regional del DENR para suporta con mga comunidades local y mejora mga facilidades educativo. (B. Garcia)