Hugot nga gipaabot sa Department of Environment and Natural Resources- Regional Office 10 (DENR-X) ang ilang dako nga suporta ngadto kang Governor Bambi Emano nga mahingusgan pa ang flagship program niini nga mao ang Turismo.
Ehemplo niini ang paghatag sa maong buhatan og 400 ka mga seedlings sa Ornamental Trees sama sa Pink Trumpet ug Golden Shower nga itanom aron mas panindoton pa ang sulod sa Misamis Oriental Tourism Complex and Botanical Garden nga nahimutang taliwala sa lungsod sa Claveria ug siyudad sa Gingoog.
Ang pagpanghatag og seedlings ngadto sa probinsya gidawat sa Provincial Environment and Natural Resources (PENRO) nga gipahigayon niadtong adlaw nga Biyernes, Marso 5, 2021 sa mismong buhatan sa DENR-10 sa Barangay Puntod, siyudad sa Cagayan de Oro.
Inisyatibo kini sa DENR-10 nga suportahan ang programang turismo ni Governor Bambi Emano kay susama ang ilang panglantaw nga dungan sa pagpalambo sa turismo aduna sab pamaagi nga maprotektahan ang kinaiyahan pinaagi sa pagpananom niining nindot nga mga kahoy nga mobulak nga makahatag og dugang atraksyon. (Provincial Information Office – MisOr)
