Davao de Oro – Mag Joint Session ang Sangguniang Panlalawigan Davao de Oro (SP-DdO) sa pagpanguna nila ni Vice Gov. Maricar Zamora ug Senior BM Arturo “Chiongkee” Uy ug ang Sangguniang Panlalawigan Agusan del Sur (SP-AgSur) sa pagpanguna ni Vice Gov. Sammuel E. Tortor alang sa official nga creation sa “Joint Technical Working Group (TWG)” nga maoy pagatahasan sa paghimo og makuting pagtuon tumong sa kasulbaran sa Boundary Issues sa nagtapad nga duha ka mga probinsya.
Kahinumduman nga nangadto sa Agusan del Sur sila si Gov. Jayvee Tyron Uy, Vice Gov. Maricar Zamora, ug DdO Provincial Officials aron opisyal nga mahinabi sila si AgSur Gov.Santiago B. Cane Jr. ug Vice Gov. Sammy Tortor sa Boundary Issues sa nagtapad nga mga lungsod sa AgSur ug DdO.
Atol sa maong panagtagbo nasabotan ang creation sa “Joint Technical Working Group” nga tahasang magtuon sa mga hisgotanang legal ug technical, ug kini opisyal nga paghimoon panahon sa Joint Session sa SP DdO ug SP Agsur sulod sa SP DdO Session Hall sa ikatulong semana sa Oktubre 2020 kon ugaling walay mga kakulian.
Tungod sa kakulangan sa teknolohiya sa karaang survey nahitabo ang boundary issues sa nagtapad nga mga probinsya nga ang kasulbaran makab-ot sa pagsinabtanay ug paghimo og bag-ong survey gamit ang mga survey instruments nga high-end kon dunay taas nga lebel sa precision ug accuracy.
(Gilbert M. Cabahug, PAO-ID DdO)