DAVAO CITY — Usa ka 22-anyos nga lalaki ang nasangit sa usa ka fixed checkpoint sa Task Force Davao ug Toril Police Station 8 sa Sirawan, Toril District, Davao City human masakpan nga nagdala og gituohang marijuana.
Gikataho nga alyas “Prince” ang pangalan sa suspetsado, residente sa Don Lorenzo Homes, Toril, Davao City.
Sumala sa report, sakay siya sa usa ka mini van diin nasakmit ang unom ka ziplock plastic sachets nga adunay sulod nga gituohang pinaugang marijuana.
Dugang niini, nadakpan ang suspetsado sa checkpoint bandang ala-1:00 sa kadlawon, Marso 29, 2025.
Nakuha gikan kaniya ang 50.1 gramos sa gituohang marijuana nga nagkantidad og P8,517.
Sa karon, himas rehas ang dinakpan ug magatubang sa kasong paglapas sa RA 9165 kun Comprehensive Dangerous Drug Act of 2002.(Camille Santos Naraga)(Source: Contributed)