TAGUM CITY – Nasikop sa kapulisan ang usa ka High Value Individual (HVI) nga nailhang alyas “Jun,” 30 anyos, ulitawo ug residente sa Barangay Visayan Village, Tagum City, atol sa gilusad nga buy-bust operation sa Barangay Mankilam alas 1:02 sa kadlawon niadtong Hunyo 20, 2026.
Ang operasyon gipahigayon sa mga operatiba sa Tagum City Police Station uban sa Regional Police Drug Enforcement Unit/Regional Special Operations Group 11 (RPDEU/RSOG 11) ug 1st Davao del Norte Provincial Mobile Force Company (1st DNPMFC), ubos sa pagmando ni PLTCOL Edgardo G. Bahan.
Sa report sa kapulisan, nakapalit ang poseur-buyer og usa ka sachet sa gidudahang shabu gikan sa suspetsado gamit ang P1,000 nga buy-bust money ug 33 ka peke nga P1,000 bills.
Gawas sa napalit nga droga, narekober usab gikan sa posisyon sa suspek ang duha ka heat-sealed sachets ug duha ka knot-tied plastic sachets nga adunay gidudahang shabu, usa ka iPhone cellphone, usa ka itom nga Reebok sling bag, ug usa ka Mica Red nga Toyota Vios nga gituohang gigamit sa ilegal nga transaksyon.
Sumala sa mga otoridad, ang kinatibuk-ang gibug-aton sa nakumpiskang gidudahang shabu miabot sa 215 gramos nga adunay gibanabanang kantidad nga P1,462,000 base sa standard drug price.
Sa pagkakaron, anaa na sa kustodiya sa Tagum City Police Station ang nadakpan ug giandam na ang kasong paglapas sa Republic Act 9165 o Comprehensive Dangerous Drugs Act of 2002, ilabina sa Section 5 (pagbaligya sa ilegal nga droga) ug Section 11 (pagpanag-iya sa ilegal nga droga). .(Camille Santos Naraga)(Source: Contributed)