Davao Del Sur – Unang girespondihan sa mga pulis sa Bansalan ang nadawat nga report gikan sa kapitan sa Barangay Rizal, kay naa silay nakita nga gipasagdan nga motorsiklo daplin sa kalsada sa Purok Kaunlaran, Rizal apan pag-abot sa mga pulis sa lugar gisultihan sila sa kapitan nga adunay gigukod ang iyang barangay kagawad nga lalaking nagmotor nga kadudahan ang lihok.
Pasado 1:20 kagahapon sa kaadlawon, Mayo 18 nadakpan ang usa ka lalaki nga sakay sa motorsiklo nga walay mapakitang mga dokumento ug pipila lang ka minuto ang milabay, miabot sa Bansalan police station ang usa ka Donald Paller, 36 anyos, residente sa CM Recto Street, Poblacion 2, Bansalan aron magpa-blotter unta kay nawala ang iyang motorsiklo ug dihang gipakita sa iyaha ang narekober nga duha ka motorsiklo, usa niini ang positibong gitudlo ni Paller nga iyaha nga igo lang gipark sa gawas sa ilang balay ug nawala.
Dinhi na gi-aresto ang batan-ong lalaki nga giila sa mga pulis nga si Brian Culili Agya, 18 anyos, residente sa Purok 6, Barangay Kapatagan, Digos City.
Mag-atubang ang dinakpan og kasong paglapas sa Republic Act 10883 kon ang New Anti-Carnapping Law. (Camille Santos Naraga)
(Source: Bansalan MPS)