MATI CITY, Davao Oriental – Tulo ka miyembro sa New People’s Army (NPA) ang boluntaryong misurender kang Davao Oriental Governor Nelson Dayanghirang, isip pagpadayag sa ilang tinguha nga biyaan na ang kalihokang komunista.
Usa sa mga misurender nga rebelde miatubang personal sa gobernador ug nagdala og usa ka armas, samtang ang laing duha ka miyembro sa NPA misurender usab niadtong miaging adlaw, Enero 7.
Ang pinakabag-ong pagsurender nahitabo kagahapon, Enero 8, 2026, sulod sa opisina sa gobernador sa Mati City.
Aminado si Gov. Dayanghirang nga dakong tabang ang Philippine Army ug uban pang security forces sa pag-awhag sa mga rebelde nga mobalik sa sabakan sa gobyerno, ug personal niyang gipasalamatan ang mga sundalo sa ilang paningkamot.
Gipasabot sa probinsiyal nga panggamhanan sa Davao Oriental nga padayon nilang panalipdan ang insurgency-free status sa probinsiya, uban ang aktibong partisipasyon ug kooperasyon sa katawhan.(Camille Santos Naraga)(Source: Contributed)