DAVAO CITY – Tulo ka persona nga gikonsidera sa kapulisan isip High Value Individuals (HVI) sa illegal nga droga ang nadakpan sa usa ka drug buy-bust operation alas 11:50 sa gabii niadtong Huwebes, Enero 8, 2026, sa Purok Bagong Buhay, Barangay Paciano Bangoy, Davao City.
Giila sa mga pulis nga miyembro sa Bajada Police Station 18 ang mga dinakpan nga sila alyas “Sarge,” 33 anyos; alyas “Jaymark,” 30 anyos; ug alyas “Dexter,” 43 anyos, nga pawang mga residente sa maong lugar.
Sumala sa ulat sa kapulisan, nadakpan ang mga suspek human magpositibo ang transaksiyon tali sa poseur buyer nga pulis ug sa mga suspek, diin nakapalit og usa ka sachet nga adunay gituohang shabu. Dugang pa, duha pa ka sachet nga adunay sulod sa gituohang shabu ang nakumpiska atol sa operasyon.
Gawas sa illegal nga droga, nakakuha usab ang mga pulis og usa ka .45 caliber nga pistola ug mga bala gikan sa mga suspek.
Matud pa sa kapulisan, ang mga dinakpan nalambigit sa pag-apod-apod sa illegal nga droga sa siyudad. Karon sila anaa na sa kustodiya sa kapulisan ug atubangon ang kasong paglapas sa Comprehensive Dangerous Drugs Act of 2002 ug illegal possession of firearms. (Camille Santos Naraga)(Source: Contributed)