DAVAO CITY – Patay ang usa ka trabahante sa motor parts human gipusil sa wala mailhing suspek sa ilang puwesto sa Sitio Towsnite, Barangay Kingking, Pantukan, Davao de Oro, pasado alas-5 sa hapon, Hunyo 8, 2025.
Giila ang biktima nga si Cyle (tinuod nga ngalan gitago), taga-Purok Mahigalaon sa maong barangay. Samtang ang iyang mga kauban nga sila alyas Jay ug Lyn, kapwa 22 anyos, naangol ug karon gi-atiman sa tambalanan.
Base sa imbestigasyon sa Pantukan Municipal Police Station, samtang nagtrabaho ang mga biktima sa Nicole Motor Parts, kalit silang gisulod sa usa ka lalaki nga diretsong namusil kang Cyle ug misibat dayon pagkahuman.
Gisulayan pa og dalag ospital si Cyle apan gideklarar siyang dead on arrival. Narecover sa crime scene ang duha ka basiyo ug usa ka buhing bala sa kalibre .45 nga pistola.
Padayon ang imbestigasyon sa kapulisan aron masuta ang motibo ug pagkatao sa mamumuno.(Camille Santos Naraga)(Source: Contributed)