Usa ka Top 7 Regional Most Wanted Person ang nasikop sa mga operatiba sa kapulisan human mapatuman ang warrant of arrest batok kaniya sa lungsod sa Kapalong, Davao del Norte niadtong Hulyo 3, 2026.
Ang nadakpan giila lamang sa alyas “Ren,” nga giatubang og kasong Rape by Sexual Assault.
Ang operasyon gilusad pinaagi sa hiniusang pwersa sa Kapalong Municipal Police Station (MPS), Provincial Intelligence Team–Davao del Norte (PIT-DDN), Regional Intelligence Unit 11 (RIU 11), 1st Davao del Norte Provincial Mobile Force Company (DNPMFC), Davao del Norte Provincial Intelligence and Investigation Unit (DNPIIU), ug Davao del Norte Provincial Intelligence and Monitoring Unit (DNPIDMU) isip kabahin sa Simultaneous Anti-Criminality Law Enforcement Operations (SACLEO).
Base sa report sa kapulisan, malinawon nga napatuman ang warrant of arrest ug gisunod ang tanang standard operating procedures atol sa operasyon. Gipahibalo usab ang suspek sa iyang mga katungod subay sa Konstitusyon sa pinulongang iyang nasabtan.
Human sa pagdakop, gidala ang nadakpan sa Kapalong Municipal Police Station alang sa hustong dokumentasyon ug mandatoryong medical examination sa dili pa iturn-over ngadto sa hustong korte alang sa dugang legal nga proseso.
Padayon ang kampanya sa kapulisan batok sa mga wanted person isip kabahin sa pagpalig-on sa kalinaw ug kahapsay sa komunidad.(Camille Santos Naraga)(Source: PNP Kapalong MPS)