Magkalain nga manhunt operations ang misangpot sa pagdakop sa duha ka Regional Most Wanted Persons sa Davao del Norte, sumala sa Davao del Norte Police Provincial Office (DNPPO).
Ang unang operasyon nahigayon sa Sitio Maag, Barangay Peñaplata, Island Garden City of Samal diin nasikop ang alyas “Frank,” nga giila isip Top 5 Regional Most Wanted Person. Giatubang niini ang tulo ka kaso sa qualified rape of a minor ug gidakop pinaagi sa warrant of arrest. Ang maong mga kaso wala usab gitugotan og piyansa.
Gipahigayon ang operasyon sa hiniusang pwersa sa IGACOS Police Station, Criminal Investigation and Detection Group (CIDG) Davao del Norte, Regional Intelligence Unit 11, ug Provincial Tracker Team sa DNPPO.
Sa laing operasyon sa Purok Basid, Sitio Matol, Barangay Gupitan, Kapalong, nasikop usab ang alyas “Erwin,” nga giila isip Top 7 Regional Most Wanted Person. Giatubang niya ang kasong rape by sexual assault, nga usa usab ka non-bailable offense.
Ang pagdakop kang “Erwin” gipangunahan sa Kapalong Municipal Police Station uban sa suporta sa RIU-11, 1st Davao del Norte Provincial Mobile Force Company, DNPIDMU, ug DNPIU isip kabahin sa Simultaneous Anti-Criminality Law Enforcement Operation (SACLEO).
Sumala ni Davao del Norte Police Provincial Director PCOL Glenn G. Cristines, ang sunod-sunod nga pagdakop nagpakita sa padayon ug lig-on nga kampanya sa kapolisan batok sa mga wanted persons aron mapaatubang sila sa hustisya.
Gihangyo usab sa DNPPO ang publiko nga magpadayon sa pagpakigtambayayong sa kapulisan pinaagi sa paghatag og kasaligan nga impormasyon aron mas mapalig-on ang kampanya batok sa kriminalidad sa lalawigan.(Camille Santos Naraga)(Source: PNP/DNPPO)