DAVAO CITY – Nagpadayon ang pagtabang sa lokal nga kagamhanan sa mga residente sa Barangay 21-C nga naapektohan sa sunog. Gipanghatagan sila og init nga pagkaon ug gipatigayon ang distribusyon sa mga pagkaon sa mga evacuation site diin temporaryo silang nagpuyo.
Aron masiguro nga komportable ug luwas ang mga biktima, gitukod ang mga modular tent, usa ka health station, ug usa ka child-minding space alang sa mga bata sa mga pamilyang naapektohan.
Nagkahiusa ang mga team gikan sa City Health Office, City Social Welfare and Development Office (CSWDO), City Disaster Risk Reduction and Management Office (CDRRMO), ug uban pang mga ahensya aron maghatag sa gikinahanglang tabang medikal, psychosocial support, ug relief assistance.
Padayon usab ang assessment sa CSWDO aron matino ang gidaghanon sa mga naapektohang pamilya ug aron mahatagan sila og angay nga suporta. .(Camille Santos Naraga)(Source: Contributed)