Sa datos alas-5 sa hapon niadtong Oktubre 2, 2025, nakadawat na ang Probinsya sa Sugbo og ₱383,370.10 nga cash donations alang sa mga biktima sa 6.9 magnitude nga linog. Gawas niini, mirehistro usab ang 6,478 ka volunteers ug nakakolekta og liboan nga ayuda sama sa pagkaon, tubig, tambal, ug sakyanan para sa transportasyon sa relief goods.
Ang mga ayuda gipanghatod na ngadto sa amihanang bahin sa Sugbo nga grabe naapektuhan. Lakip sa mga lugar nga natagaan sa relief ang Bogo City, Medellin, Daanbantayan, San Remigio, Tabogon, Tabuelan, Borbon, Sogod ug Tuburan. Ang pag-apod-apod gihimo uban sa tabang sa mga ahensya sa gobyerno, volunteers, ug pribadong sektor.
Ang dakong pagtinabangay sa katawhan ug mga organisasyon nagpakita sa lig-on nga espiritu sa bayanihan. Ang matag kahon sa bugas, botelya sa tubig, ug tambal nga gipanghatod nagdala usab og mensahe sa paglaom ug kadasig para sa mga biktima nga naglisod karon sa evacuation centers.
Gipasalamatan sa Kapitolyo ang tanang Sugboanon ug mga partners nga nagpadayon sa ilang suporta. Matod pa nila, ang matag kontribusyon, bisan gamay o dako, dako kaayong tabang aron mapadali ang kaluwasan ug kahupayan sa mga apektadong pamilya.
Sa padayon nga pagtinabangay, gipanghinaut sa mga lider sa probinsya nga mas paspas ang pagbangon sa Sugbo gikan sa daku nga kadaot nga dala sa linog.
Source: Cebu Province PIO
I via Renante Socia Lada