DAVAO CITY — Duha ka drayber ang nasamdan human magbangga ang usa ka SUV ug L300 van sa coastal road sa Davao City kagahapon sa hapon, Hulyo 29, 2025.
Base sa inisyal nga imbestigasyon sa kapulisan, gikan sa Punta Dumalag ang L300 van ug paingon sa Bago Aplaya, samtang ang SUV gikan sa Talomo Cemento ug paingon sa sentro sa syudad.
Nagasubay sa nagkasinupakong linya ang duha ka sakyanan. Pag-abot sa lugar sa insidente, naigo sa gutter ang atubangan nga ligid sa SUV nga gimaneho ni Irene Pontemayor Lee, 40 anyos, residente sa South Pacific, Catalunan Pequeño. Tungod niini, nawad-an kini og kontrol ug misulod sa pikas lane diin nabangga niini ang L300 van nga gimaneho ni Samuel James Soon Duhaylungsod, 47 anyos, taga St. Michael Village, Maa.
Human sa unang bangga, midiretso pa ang SUV ug nabangga sa pader, diin kini hingpit nga mihunong.
Sa kusog nga impact sa aksidente, parehong nasamdan ang duha ka drayber. Gihatagan sila og unang tabang sa emergency medical technician sa Central 911 ug pagkahuman, gidala sa Southern Philippines Medical Center (SPMC) para sa dugang nga medikal nga atensyon. .(Camille Santos Naraga)(Source: Contributed)