Sa iyang paningkamot nga mapaayo pa ang serbisyo medikal sa mga Sugbuanon, gipahibalo ni Gobernadora Pamela Baricuatro nga magpahigayon ang Kapitolyo sa lalawigan sa Cebu og sunod-sunod nga dagkong medical ug surgical missions karong buwan sa Agosto. Kini usa sa mga nag-unang kalihukan alang sa pagsaulog sa ika-456 nga anibersaryo sa pagkatukod sa probinsya.
Gibutyag karong adlawa ni Gobernadora Baricuatro nga ang “Serbisyo Karaban” sa Agosto magpasiugda og mga medical ug surgical missions matag semana, ilabi na sa mga isla sa Bantayan ug Camotes, ug sa upat ka provincial hospitals nga nahimutang sa mga siyudad sa Bogo, Danao, Carcar ug sa lungsod sa Balamban.
Sumala ni Dr. Elisse Nicole Catalan, consultant sa Kapitolyo sa kahimsog, ang mga surgical procedures nga itanyag sa mga misyon naglakip sa thyroid ug breast surgery, hernia repair, gastrostomy, pagtambal sa peri-anal abscess, gallbladder surgery, anal fistula ug hemorrhoid surgery, orthopedic procedures, ug bayook removal. Apil usab sa minor surgeries ang pagtangtang sa mga bukol-bukol ug bugon.
Gipasabot ni Dr. Catalan nga kini usa ka dakong paningkamot nga maghatag og prayoridad sa mga surgical nga serbisyo kauban sa konsultasyong medikal. Kada misyon nagtumong sa pagserbisyo sa labing menos 30 ka pasyente nga nanginahanglan og operasyon, ug mas daghan pa alang sa mga konsultasyon. Gihangyo usab ang mga pasyente nga mokontak sa labing duol nga Capitol-run hospital o sa ilang lokal nga kagamhanan alang sa pre-screening, ilabi na ang mga kabus nga residente.
Bisan tuod temporaryo lang ang mga medical missions isip tubag sa kakuwang sa serbisyo sa kahimsog, naglaum si Dr. Catalan nga magpadayon ang programa pinaagi sa igo nga pondo ug suporta sa institusyon.
Source: Cebu Province PIO
I via Renante Socia Lada