MATI CITY, Davao Oriental — Nadakpan sa hiniusang pwersa sa Mati City Police Station (CPS), Davao Oriental Police Provincial Office (DOPPO), Regional Mobile Force Battalion 11 (RMFB 11), ug Philippine Drug Enforcement Agency (PDEA) ang usa ka lalaki nga gituohang nalambigit sa iligal nga droga atol sa buy-bust operation sa siyudad.
Ang suspek, nga nailhan sa alyas “Ling,” 46 anyos, nasikop sa Doña Rosa 1, Barangay Central sa gabii niadtong Hunyo 10, 2026, human mapalitan sa gituohang shabu sa mga operatiba nga nagpakaaron-ingnon isip buyer.
Narekober sa mga awtoridad ang gituohang shabu nga adunay gibanabanang kantidad nga ₱2,040, lakip ang buy-bust money nga gigamit sa operasyon.
Gikustodiya karon sa kapulisan ang suspek samtang gipadayon ang legal nga proseso batok kaniya. Gipasakaan na usab siya og kaso tungod sa paglapas sa Republic Act 9165 o ang Comprehensive Dangerous Drugs Act of 2002. (Camille Santos Naraga)(Source: Contributed)